குண்டன் பில்லி - மினி லயன் நமக்கு அறிமுகம் செய்து வைத்த அற்புத பாத்திரம்

கழக கண்மணிகளே, உடன் பிறப்பே, ரத்தத்தின் ரத்தமே, 

வணக்கம்.

முதலில் நான் இந்த வலையுலக நண்பர்களுக்கு என்னுடைய மன்னிப்பை சமர்பிக்கிறேன். அந்த மன்னிப்பின் பிரதிபலிப்பே அருகில் உள்ள இந்த அறிவிப்பு. இனிமேலும் அடுத்தவரை நான் பின்தொடர போவதில்லை. என்னுடைய் சொந்தமான இடுகைகளை இனிமேல் நீங்கள் காணலாம்.

என்னுடைய சிறுவயதில் நான் காமிக்ஸ் படிக்க ஆரம்பித்தபோது, முத்து காமிக்ஸ்'ஐ நெடு நாளாக படித்தாலும், ஏனோ எனக்கு முழு சந்தோஷம் வரவில்லை. பின்னர் லயன் காமிக்ஸ் ஆரம்பித்த போதும், மினி லயன் வெளி வந்த போதும் அதே நிலை தான். ஆனால் திகில் காமிக்ஸ் ஆரம்பித்த போது நிலைமை சற்று மாறியது. ஆனாலும் என்னுடைய அக்கா மகன் (அப்போது நான்காம் வகுப்பில் இருந்தான்) இந்த காமிக்ஸ்'ஐ படிக்க சற்று பயந்தான். ஆனால் மினி லயன் பெரிய அளவில் இரண்டு ருபாய் விலையில் வந்த போது எனக்கு மிகவும் சந்தோஷம் ஏற்பட்டது. ஏனெனில் இந்த புத்தகத்தில் தான் பலப் பல சிறு கதைகள் வந்தது. என்னுடைய அக்கா மகன் மிகவும் சந்தோஷப்பட்டான். நானும்தான்.

அதில் எங்கள் இருவருக்கும் மிகவும் பிடித்த ஒரு கதாபாத்திரமே குண்டன் பில்லி. அனைத்து வயதினரையும் கவரும் இவனது சேட்டைகள் எங்கள் மனதை கொள்ளை கொண்டதில் வியப்பேதும் இல்லை. முதன் முதலில் பில்லி ஒரு கதையில் தோன்றி இந்த வருடம் பிப்ரவரி மாதத்தோடு நூறு வருடங்கள் ஆகின்ற வெளியில் இதைப் பற்றி ஒரு முழு இடுகை இட வேண்டும் என்று எனக்கு தோன்றியது. அதன் விளைவே இந்த அறிக்கை.

குண்டன் பில்லி முதன் முதலில் ஒரு கதையில் தோன்றியது 1908ம் ஆண்டில்தான். பிளீட்வே குழுமத்தில் இருந்த ஒரு பத்திரிக்கையே "த மேக்னட்" (The Magnet) ஆகும். திரு பிரான்க் ரிச்சர்ட்ஸ் (Frank Richards) என்பவர்தான் இந்த கதையின் ஆசிரியர் ஆவார். இவர் தொடர்ந்து இந்த குண்டன் பில்லி தொடரை முப்பதிஒரு வருடங்கள் எழுதினார் (1908 - 1939).

குண்டன் பில்லி முதலில் கருப்பு-வெள்ளையிலேயே வெளி வந்தான். இந்த சில அறிய சித்திரங்களை பார்த்து மகிழுங்கள். இவை எல்லாம் ஆரம்ப காலத்தில் (பிரான்க் ரிச்சர்ட்ஸ் காலத்தில்) வெளி வந்த தொடர்கள்.

குண்டன் பில்லி படித்த பள்ளிக்கூடத்தின் பெயர் புலோரியாட் கிரேபிரயர்ஸ் (Floriat GreyFriars) ஆகும். இந்த படம் குண்டன் பில்லி'இன் ஐம்பதாவது ஆண்டை நினைவுபடுத்தும் வகையில் வெளியிடப்பட்டது ஆகும்.

அந்த பள்ளியின் மேப் இதோ. இந்த பள்ளி ஒரு கற்பனை பள்ளிக்கூடம் ஆகும். இந்த ஒரு எண்ணத்தை கொண்டே குழந்தை உலகின் தலை சிறந்த எழுத்தாளராகிய திரு வாண்டுமாமா அவர்கள் குஷிவாளி ஸ்கூலில் ஹரிஷ் என்ற தொடரை ஆரம்பித்தார் என்பது என்னுடைய எண்ணம். இதனை பற்றி திரு அய்யம்பாளையம் அவர்கள் விளக்கம் அளித்தால் நான் மிகவும் மகிழ்ச்சி அடைவேன்.

அந்த பள்ளிக்கூடத்தின் உள் கட்டமைப்பு வரைப்படம் இதோ உங்களின் மேம்பட்ட பார்வைக்கு. இது போன்ற பள்ளிகள் நாம் படிக்கும்போது இல்லையே என நான் மிகவும் வருத்தப்பட்ட காலங்கள் உண்டு. திரு வாண்டுமாமா அவர்களை ஒரு முறை சந்தித்த போது இதனை அவரிடம் கூறி என்னுடைய நீண்ட நாள் ஆதங்கத்தை வெளியிட்டு விட்டேன்.

இந்த மேக்னெட் இதழின் சில அட்டைப்படங்கள். வாசக அன்பர்கள் ஒரு விஷயத்தை அறிய வேண்டும். பிளீட்வே குழுமத்தின் ஆரம்ப கால இதழ்களைப்ற்றிய விபரங்கள் எங்குமே தெளிவாக தெரிவிக்கப்படவில்லை. ஆகையால் தான் இது போன்ற தெளிவில்லாத படங்களை வெளியிட வேண்டியதாக போயிற்று. மன்னிக்கவும்.

         

தீவிர காமிக்ஸ் ஆய்வர்களாகிய திரு சதீஷ், முத்துபேன், விஸ்வா, அய்யம்பாளையம் போன்றவர்கள் குண்டன் பில்லி பற்றிய விபரங்களை தெரிவித்தால் நான் மிகவும் சந்தோஷப்படுவேன்.

    

திரு பிரான்க் ரிச்சர்ட்ஸ் அவர்களால் எழுதப்பட்ட குண்டன் பில்லி தொடர் மிகவும் பிரபலம் அடைந்ததால் அந்த சிறுகதைகளை எல்லாம் முழு நீள நாவல்களாக மாற்றி எழுதினார். சென்ற நூற்றாண்டின் ஆரம்ப கால கட்டத்தில் இந்த நாவல்கள் மிகவும் பிரபலம் பெற்றவை ஆகும்.

        

    

இந்த கதைகள் எதையும் நாம் படிக்க வில்லை என்பதே மிகவும் மனவருத்தம் அளிக்கும் ஒரு விஷயம் ஆகும். ஏனென்றால் இந்த கதைகள் எதையும் திரு விஜயன் அவர்கள் வெளியிடவில்லை என்பது நிதர்சனமான உண்மை.

   

   

இந்த நாவல்கள் பிரபலம் பெற்றதால் அவை மீண்டும் மறுபதிப்பு செய்யப்பட்டன. இவற்றையும் மீறி காமிக்ஸ் ரசிகர்களின் வேண்டுகோளுக்கிணங்க அனைத்து சித்திரக்கதைகளும் ஒரு டைஜஸ்ட் வடிவில் வெளிவந்தது. இவையே பில்லி பண்டர்ஸ் ஓன் (Billy Bunter's Own) என்று வெளிவந்தது. இந்த கொள்கை அடிப்படையிலேயே காக்கை காளி டைஜஸ்ட் வெளிவந்ததாக நியாபகம்

   

திரு பிரான்க் ரிச்சர்ட்ஸ் அவர்களின் மறைவுக்கு பின்னர், திரு சார்லஸ் ஆமில்டன் (Charles Hamilton) அவர்கள் நாக்-அவுட் (Knock Out) என்ற காமிக்ஸ் இதழில் 1939ம் ஆண்டு மார்ச் மாதம் முதல் குண்டன் பில்லியை மைய்யமாக கொண்டு கதைகளை எழுத ஆரம்பித்தார். இந்த தொடருக்கு பிரான்க் மின்னிட் (Frank Minnit) மற்றும் ரெக் பர்லேட் (Reg Parlett) ஆகிய இருவரும் சித்திரம் வரைய ஆரம்பித்தனர். இந்த தொடர் 1963ம் ஆண்டு வரை வெளிவந்தது. 

ஆனால் நம்முடைய மினி லயன் இதழில் வெளிவந்த குண்டன் பில்லியன் கதைகள் யாவும் இந்த தொடரில் கூட வெளிவரவில்லை. இந்த தொடருக்கு பின்னர் வாலியண்ட் (Valiant: 1963 - 1976) என்னும் ஒரு காமிக்ஸ் இதழில் வெளிவந்தவையே நமக்கு பரிச்சயமான தொடர் ஆகும். இதோ அந்த தொடரில் வெளிவந்த ஒரு அட்டைப்படம்.

என்ன, இந்த சித்திரங்கள் மிகவும் பரிச்சையமானவையாக தோன்றுகிறதா? அம், இவையே நமது மினி லயனில் வெளிவந்த சித்திரதொடர். ஒவ்வொரு குண்டன் பில்லி கதையும் மிகவும் சிறப்பாக வடிவமைக்கப்பட்டவை ஆகும். எப்பொழுதும் எதையாவது தின்று கொண்டே இருக்க நினைக்கும் பில்லிக்கும் அவரது பிரின்சிபால் மற்றும் சக நண்பர்கள் உடன் ஏற்படும் வேடிக்கையான நிகழ்வுகளே வாடிக்கையாக அமைவது நமக்கு தெரிந்ததே.

பிளீட்வே குழுமத்தில் இருந்து வெளிவந்த இந்த தொடர் நெதர்லாந்து நாட்டில் மிகவும் பிரபலம் ஆனது. அதனால், பிளீட்வே குழுமத்தினர் தங்களின் அனைத்து குண்டன் பில்லி கதைகளையும் நெதர்லாந்து நாட்டிற்க்கு அனுப்பினார். அங்கு, அவை மொழி மாற்றம் செய்யப்பட்டு மிகப்பெரும் வெற்றி பெற்றன என்பதை சொல்லவும் வேண்டுமா என்ன? ஒரு காலகட்டத்தில் ஒரிஜினல் தொடர்கள் முடிந்ததால் நெதர்லாந்து நாட்டின் ஓவியர்கள் ஜான் வான் டேர் கூ, ஜெரார்ட் லீவர், ராபர்ட் வான் டேர் கிராப்ட் போன்றவர்கள் தொடர்ந்து வரையா ஆரம்பித்தனர். இது 1981ம் ஆண்டு வரை தொடர்ந்தது. பின்னர் பிரான்க் மின்னிட் மற்றும் ரெக் பர்லேட் ஆகியோர் வரைந்த சித்திரதொடரை மறுபதிப்பு செய்தனர். இவையும் 1991ம் ஆண்டு வரையே தொடர்ந்து. அதன் பின்னர் இந்த தொடர் வெளி வரவில்லை.

குண்டன் பில்லியன் புகழ் நெதர்லாந்து நாட்டில் உச்சத்தில் இருந்த போது 1978ம் ஆண்டு ஒரு திரைப்படம் ஆக வெளிவந்தது. இந்த திரைப்படம் Torrent-ல் டவுன் லோட் முறையில் கிடைக்கின்றது. இதோ, அந்த திரைப்படத்தின் போஸ்டர்.

படவிவரங்கள்- வருடம் : 1978

ஓடும் நேரம் : 94 நிமிடங்கள்

மொழி : டச்சு மொழி (நெதர்லாந்து)

சப்-டைட்டில் : ஆங்கிலம் இயக்கம் : ஹென்க் வான் டேர் லிண்டன்

படத்தின் பெயர் : Billie Turf-Het Dikste Studentje Ter Wereld

நடிப்பு : ஹப் கான்ஸ்டன், டாம் ஜான்சன்

இந்த திரைப்படத்தின் மாபெரும் வெற்றியை தொடர்ந்து மூன்று வருடங்கள் கழித்து மற்றுமொரு திரைப்படத்தை அதே குழுவினர் இன்னுமொரு திரைப்படத்தை வெளியிட்டனர். இதோ அந்த திரைப்படத்தின் போஸ்டர்:

படவிவரங்கள்- வருடம் : 1981

ஓடும் நேரம் : 96 நிமிடங்கள்

மொழி : டச்சு மொழி (நெதர்லாந்து)

சப்-டைட்டில் : ஆங்கிலம் இயக்கம் : ஹென்க் வான் டேர் லிண்டன்

படத்தின் பெயர் : Billy Turf haantie de voorste

நடிப்பு : ஹப் கான்ஸ்டன், ரேமண்ட வான் ஹாப்

இந்த திரைப்படமும் மாபெரும் வெற்றியை அந்த திரைப்பட கம்பெனிக்கு ஈட்டியது. அதனால் அதை தொடர்ந்து ஒரு வருடம் கழித்து மற்றுமொரு திரைப்படத்தை அதே குழுவினர் இன்னுமொரு திரைப்படத்தை வெளியிட்டனர். இதோ அந்த திரைப்படத்தின் போஸ்டர்:

படவிவரங்கள்- வருடம் : 1982

ஓடும் நேரம் : 90 நிமிடங்கள்

மொழி : டச்சு மொழி (நெதர்லாந்து)

சப்-டைட்டில் : ஆங்கிலம் இயக்கம் : ஹென்க் வான் டேர் லிண்டன்

படத்தின் பெயர் : Billy Turf contra Kweel

நடிப்பு : ஹப் கான்ஸ்டன், ரேமண்ட வான் ஹாப்

இந்த திரைப்படங்களுக்கு எல்லாம் முன்னோடியாக தொலைக் காட்சி தொடர் ஒன்று குண்டன் பில்லியை மைய்யமாக கொண்டு வந்ததாக கேள்வி. அந்த தொடரை பற்றிய விவரங்களை என்னால் சேகரிக்க இயலவில்லை. ஆனாலும் அந்த தொடரில் பில்லி ஆக நடித்த சிறுவனின் பெயர் ஜெரால்ட் கேம்ப்யன் ஆவார். இதோ அவரின் ஒரு அறிய புகைப்படம்.

மினி லயனில் ஒரே ஒரு முறை மட்டும் பில்லியன் சகோதரி ஆன பெஸ்ஸி வந்ததாக நினைவு. தீவிர லயன் காமிக்ஸ் வாசகர்கள் பின்னுட்டம் மூலம் இதனை வெளிப்படுத்தினால் நான் மிகவும் மகிழ்வேன். இதோ, பெஸ்ஸியை மைய்யமாக கொண்டு வந்த தொடரின் கதைகள்:

      

இந்தப் படத்தை வாய்ப்பு கிடைப்பவர்கள் தவறாது பார்க்குமாறு கேட்டுக் கொள்கிறேன். மறக்காமல் உங்கள் மேலான கருத்துக்களை பின்னூட்டமாக இட்டுச்செல்லுங்கள். இந்தப் பதிவை பொறுமையுடன் படித்ததற்கு நன்றி!  

இது போன்ற பதிவுகளை மேலும் தொடரலாமா என கருத்துரையிடுங்களேன்? தயவு செய்து உங்களின் கருத்துகளை பதிவு செய்து கழக கண்மணிகளாக மாறுங்கள்.  

நன்றிகள் எனக்கும் பாராட்டுகள் நமக்கும். இப்போதைக்கு அவ்வளவுதான், மீண்டும் சந்திப்போம். விரைவில்.

டெக்ஸ் வில்லர் திரைப் படம்

கழக கண்மணிகளே, உடன் பிறப்பே, ரத்தத்தின் ரத்தமே, 

வணக்கம், 

வலைப்பூவை வந்து பார்த்து வாழ்த்தியோருக்கு நன்றி! வலையுலகத்திற்கு புதிய இயக்கமாகிய நம்மையும் சிலர் பின் தொடர்கிறார்கள். அவர்களுக்கு நமது இயக்கத்தின் சார்பாக நன்றிகள். பின்னூட்டம் இட்ட அனைவருக்கும் நன்றிகள். 

ரொம்ப நாளாக ஒலக சினிமா பற்றி எழுதலாம் என்று நினைத்து கொண்டு இருந்தேன். இதோ அதில் முதல் பதிவு. 

சமீபத்தில் லயன் காமிக்ஸில் வெளிவந்த 'எமனின் எல்லையில்' கதாநாயகனாகிய டெக்ஸ் வில்லர் பாத்திரத்தை வெள்ளி திரையில் கொணரும் முயற்சியில் ஒரு திரைப் படம் வந்ததாக ரொம்ப நாளாக கேள்வி பட்டு இருக்கிறேன். சமீபத்தில் தான் அந்த படத்தின் ‘எண்மிய பல்திற வட்டு’ம் (அட டிவிடிங்க) கிடைத்தது. ஆர்வ மிகுதியால் உடனே அந்த படத்தை பார்த்தும் விட்டேன்.

இந்த படத்தின் போஸ்டேர்கள் இதோ:

இதோ மற்றுமொரு போஸ்டர்:

இன்டியானா ஜோன்ஸ் அப்போது பிரசித்தமாக இருந்ததால் அந்த ஸ்டைலில் ஒரு போஸ்டர்:

படத்தின் கதை சுருக்கம் இதோ: செவ்விந்திய பழங்குடியினரில் ஒரு இனமான யாக்கை இனத்தினர் பல ஆண்டுகளாக கட்டுப்படுத்தி இருந்த தங்களின் பழி வாங்கும் உணர்ச்சியை அடக்க இயலாமல், வெள்ளையரை பழி வாங்க தீவிரமாக முயல்கின்றனர். அவர்கள் படத்தின் ஆரம்பத்தில் வெள்ளையர்கள் செல்லும் ஒரு ரயிலை கொள்ளை அடிக்கின்றனர். பல செவ்விந்திய பழங்குடியினரை ஒன்று திரட்டி ஒரு மிகப்பெரும் படைபலத்தை உருவாக்குகின்றனர். 

ஆனால் அவர்களின் இந்த திடீர் தாக்குதலுக்கு காரணமே அவர்கள் வாசம் உள்ள ஒரு விசித்திர ஆயுதம் ஆகும். அந்த ஆஉ\யுத்தத்தின் மூலம் அவர்கள் தங்கள் எதிரிகளை வெறும் கற்சிலையாக மாற்றும் திறன் கொண்டவர்களாக உருவெடுக்கின்றனர். இவர்களை கட்டுப்படுத்த ரேஞ்சர் ஆன டெக்ஸ் வில்லர் தன்னுடைய சகாவான கிட் கார்சனுடன் வருகிறார். இவர்களுடன் நவஜோ இனத்தை சேர்ந்த டைகர் ஜாக் சேர்ந்து கொள்ளுகிறார். ஆங்கிலேயர்களுக்கான படமாதலால் அவர் படம் முழுக்க ஊமை போல வருகிறார். இவருக்கு பதிலாக டெக்ஸ்'இன் மகனான கிட்'ஐ போட்டு இருக்கலாம். ஆனால், டெக்ஸ் வயதானவர் என்பது தெரிந்து விடும் என்பதால் படத்தின் இயக்குனர் அவ்வாறு செய்ய வில்லை. 

துப்பாக்கி சுடுவதில் உள்ள திறமையை டெக்ஸ் சிறப்பாக வெளிப்பட்திய போதிலும், ஏனோ இந்த படம் அப்படி ஒன்றும் சிறப்பாக இல்லை என்பதே என் கருத்து.

படத்தின் எண்மிய பல்திற வட்டு இப்போது சில இணைய தளங்களில் கிடைக்கின்றது. இந்த எண்மிய பல்திற வட்டின் முன் அட்டை பகுதி இதோ:

இந்த எண்மிய பல்திற வட்டின் பின் அட்டை பகுதி இதோ:

லார்ட் ஆப் த டீப் படத்தின் எண்மிய பல்திற வட்டு அட்டை பகுதி:

லார்ட் ஆப் த டீப் படத்தின் எண்மிய பல்திற வட்டு

படவிவரங்கள்: வருடம் : 1985

ஓடும் நேரம் : 104 நிமிடங்கள்

மொழி : இத்தாலிய மொழி

சப்-டைட்டில் : ஆங்கிலம்

இயக்கம் : டுக்கயோ டேச்சரி

கதை: கிஒவன்னி போனெல்லி

இசை : கியன்னி பிர்ரயோ

ஒளிப்பதிவு : பிஎத்ரோ மொர்பிடெல்லி

எடிட்டிங் : லிடியா போரடி

தயாரிப்பு : என்சோ போர்செல்லி

அந்த படம் வரும்போது இத்தாலியில் வந்த தினசரிகளில் வெளிவந்த விளம்பரம் இதோ.  

அந்த விளம்பரத்தின் படக் காட்சி இதோ உங்களின் பார்வைக்கு:

படத்தில் டெக்ஸ் வில்லர்'ஆக நடித்தவர் கிலியானோ கெம்மா ஆவார்.

படத்தில் கிட் கார்சன்'ஆக நடித்தவர் வில்லியம் பெர்கேர் ஆவார்.

படத்தில் டைகர் ஜாக் ஆக நடித்தவர் கார்லோ முகாரி ஆவார்

படத்தில் கார்லோஸ் தோன்றும் ஒரு காட்சி:

படத்தின் ஆரம்ப காட்சிகளில் மூன்று குதிரை வீரர்களும் தோன்றும் ஒரு காட்சி உங்களின் பார்வைக்கு:

மூன்று குதிரை வீரர்களும் படத்தின் இயக்குனரும்:

இந்தப் படத்தை வாய்ப்பு கிடைப்பவர்கள் தவறாது பார்க்குமாறு கேட்டுக் கொள்கிறேன். மறக்காமல் உங்கள் மேலான கருத்துக்களை பின்னூட்டமாக இட்டுச்செல்லுங்கள். இந்தப் பதிவை பொறுமையுடன் படித்ததற்கு நன்றி! 

இது போன்ற பதிவுகளை மேலும் தொடரலாமா என கருத்துரையிடுங்களேன்?  

தயவு செய்து உங்களின் கருத்துகளை பதிவு செய்து கழக கண்மணிகளாக மாறுங்கள். நன்றிகள் எனக்கும் பாராட்டுகள் நமக்கும்.

இப்போதைக்கு அவ்வளோதான், மீண்டும் சந்திப்போம்.

பி. கு:

அய்யம்பளையத்தார் பின்னிப்பெடலெடுத்துக் கொண்டிருக்கிறார். அவரது வலைப்பூவின் வடிவமைப்பு நாளுக்குநாள் மெருகேறிக்கொண்டேயிருக்கிறது. சுதந்திரத்திற்கு முன்வந்த அம்புலிமாமா இதழை அவர் நமக்கெல்லாம் அறிமுகப்படுத்தியிருக்கிறார். படிக்க இங்கே 'க்ளிக்'கவும்.  

இதுவரை 'ஹைக்கூ' எழுதுகிறேன் பேர்வழி என்று நம்மையெல்லாம் இம்சித்துக்கொண்டிருந்த 'பங்கு வேட்டையர்' இப்போது 'கௌபாய்' கதை வேறு எழுதுகிறார். அதில் எல்லோரது டவுசரையும் அவிழ்த்து விடுவது என கங்கணம் கட்டிக் கொண்டு அலைகிறார். உஷார்! மக்களே, உஷார்! பாகம்-1, பாகம்-2.  

நமக்குப் போட்டியாக 'ஆ கோ தீ க .' மற்றும் 'முதலை பட்டாளம்' என இரு சக தீவிரவாதிகள் வலைப்பூக்களை ஆரம்பித்துள்ளனர். இதில் 'முதலை பட்டாளம்' வைத்திருக்கும் ‘ப்ருனோ பிரேசில்’ ஒரு கவுண்டர்-டெர்ரரிஸ்ட் என கூறிக்கொள்கிறார்! வரவேற்கிறோம்! அவர்களுக்கு ஒரு பணிவான வேண்டுகோள்! சும்மா ஒரு பதிவோடு நிறுத்திவிடாமல் தொடர்ந்து காமிக்ஸ் பற்றி எழுதுங்கள். காமிக்ஸ் பற்றி உங்கள் அனுபவங்களை பகிர்ந்து கொள்ளுங்கள். காமிக்ஸ் என்பது ஒரு கடல். அதில் எல்லோரும் சேர்ந்தே முத்தெடுக்கலாமே?

தொடர்புடைய இணைய தளங்கள்: 

பட விவரங்களை தெரிந்து கொள்ள: இங்கே வாருங்கள்

ஆங்கில மொழி அடி கற்றைகளுக்கு: இங்கே கிளிக்குங்கள்

ட்ரைலர் பார்க்க: இங்கே நுழையுங்கள் 

டவுன்லோட் செய்ய: இவ்விடம் வர வேண்டும்  

மேலும் விபரங்களுக்கு: இங்கு சென்று பார்க்கவும்

க.கொ.க.கூ என்றால் என்ன?

கழக கண்மணிகளே, உடன் பிறப்பே, ரதத்தின் ரத்தமே,

தமிழில் தொன்று தொட்டு வரும் காமிக்ஸ்'ஆகிய முத்துவின் முதல் இதழான 'இரும்புக்கை மாயாவி'யில் மாயாவி 'க.கொ.க.கூ.' (கடத்தல் கொலை கலகக் கூட்டமைப்பு) என்னும் இயக்கத்துக்கு எதிராக போராடுவார், இதுவே எங்கள் / நமது இயக்கமாகும். கீழே முத்து காமிக்ஸ்'இன் லோகோ உள்ளது. புதிதாக காமிக்ஸ் பற்றி படிப்பவர்கள் தெரிந்து கொள்ள இது உதவும்.

பின்னர் 'மர்மத்தீவில் மாயாவி' கதையிலும் இக்கூட்டத்தைச் சேர்ந்த 'ஸ்கார்ல்' எனும் வில்லனோடு மோதுவார். இந்த ஸ்கார்ல் தான் நமது அப்போதைய தலைவர். இதோ, அந்த கதையின் தமிழில் வந்த பதிப்பும் & ஆங்கிலத்தில் வந்த பதிப்பின் அட்டை படங்கள்.

க.கொ.க.கூ.வின் ஒரிஜினல் பெயர் 'F.E.A.R.' (Federation of Extortion, Assassination and Rebellion) என்பதாகும். இவர்கள் காமிக்ஸ் உலகில் மிகவும் பிரசித்தி பெற்ற ஒரு அமைப்பினர் ஆவர்கள். இவர்கள் பிலீட்வே என்னும் ஒரு லண்டனை சேர்ந்த பதிப்பகத்தின் சித்திர கதைகளில் வரும் அமைப்பினர்.இது தான் முத்து காமிக்ஸ்'இன் முதல் இதழ் அட்டை படம். இந்த கதையில் தான் நமது இயக்கம் முதன்முதலில் உலகிற்கு தெரிய வர ஆரம்பித்தது.

இது, முத்து காமிக்ஸ்' பதிப்பகத்தின் ஆங்கில இதழான மோடி காமிக்ஸ்'இன் அட்டை படம். இந்த புத்தகம் மிகவும் அரிதான ஒன்றாகும்.

இந்த இதழ் தான் நாம் மேலே பாத்த இதழ்களின் அப்பா (மூலகர்த்தா). ஆம், இதுதான் மேற்கூறிய புத்தகங்களின் ஒரிஜினல்.

இது மற்றுமொரு ஆங்கில இதழின் அட்டை.

இங்கு பாருங்கள் கண்மணிகளே, இப்படி தான் நாம் நம்மை உலகிற்கு தெரிவித்தோம். ஒரு விளம்பரம்தான். உடனே உடன் பிறப்புகள் கேட்கலாம்: நெருப்பிற்கு எதற்கு தீக்குச்சி? என்று. ஆனால், இன்றைய சந்தைமயமாகிவிட்ட உலகில், விளம்பரம் இல்லாமல் எதுவுமே இல்லை.

இது மற்றுமொரு ஆங்கில இதழின் அட்டை.

வாய்ப்பு அளித்தமைக்கு நன்றி. தயவு செய்து உங்களின் கருத்துகளை பதிவு செய்து கழக கண்மணிகளாக மாறுங்கள். நன்றிகள் எனக்கும் பாராட்டுகள் நமக்கும்..